KALIBO, Aklan—Patay ro sangka driver kaibahan ro anang pahinante kat mahueog ro andang ginasakyan nga 10-wheeler truck (wing van) nga kargado it sinako nga mga animal feeds bandang alas-5:50 it aga-aga sa sangka bangin sa Brgy. Libertad, Nabas, Aklan.
Ginkilaea ni Reynard Dela Cruz it Municipal Disaster Risk Reduction and Management Office (MDRRMO)-Nabas ro driver it truck nga si Juan Noli Francisco, 55-anyos ag residente it Brgy. Caano, Kalibo, Aklan samtang ro anang pahinante hay si Ronald Mirano it Brgy. Bulabud, Malinao, Aklan.
Ro daywa hay parehong gindeklarang patay eon kat maka-abot sa Ibajay District Hospital tuga it naangkon nga lastro sa nagkaeain-eain nga parte it eawas.
Suno kay Dela Cruz nga naging mabudlay ro pagbo-oe sa eawas it pahinante matapos nga maigpit it bumaliskad nga trucking.
Ginapatihan nga posibleng natueugan ro driver nga naging rason it aksidente.
Sa inisyal nga imbestigasyon, naga-agi ro wing van sa pakurbada nga karsada kat gulpi raya nga dumiretso sa bangin nga may daeum nga tatlo hasta limang metro ro kadaeumon.
Nasayuran nga bag-o eamang nga naghalin sa Caticlan jetty port ro mga biktima ag maga-deliver kunta it feeds sa banwa it Kalibo.
Nasayuran nga ro trucking hay ginapanag-iyahan it MB builders incorporated nga nakabase sa Brgy. Laguinbanua East, Numancia, Aklan.
Nagapati ro MDRRMO-Nabas nga overloaded ro saeakyan.
Uman nga nagpadumdum ro mga otoridad sa mga motorista nga magdahan sa pagmaneho eabi eon sa nasambit nga lugar nga makabig nga accident prone area.
