BALETE, Aklan — Nakaangkon it lastro ag kasakitan sa eawas ro daywang sakay it wing van nga nahueog sa banglid nga sakop it Sitio Bangbang, Brgy. Feliciano sa banwa it Balete.
Ginpahayag it driver nga si Arjay Morris, sa legal nga edad ag residente it Bicol kaibahan ro pahinante nga si Leofoldo Abolincia, sa legal man nga edad nga halin pa sanda it Baguio City ag paadto kunta it syudad it Iloilo kat naaksidente sa nasambit nga lugar.
Bukon nanda it kabisado ro lugar kon sa siin pag-abot sa pakurbada nga parte it karsada hay nadueaan sigon it kontrol ro driver sa anang ginamaneho nga saeakyan rason nga dumiretso raya sa banglid.
Ginpapanaog man ro mga karga nanda nga tinuean-on agud nga inde makaangkon it dugang nga kasamaran daea it nasambit nga aksiente.
Sa pihak nga parte, nagpatigayon it road flushing ro Bureau of Fire Protection (BFP) sa lugar agud nga malikawan ro dugang nga aksidente.
Ginakabig nga accident prone area ro nasambit nga lugar bangud sa inde eon mahuyap nga mga natabo nga aksidente kapin eon kon mabaskog ro uean.
Ro andang ginhimo nga flushing hay tuyo nga himuong mas maayos ro daean para sa mga motorista ag iba pang byahero.
Samtang, ginasugid nga kaabuan sa mga delivery truck nga indi maka-agi sa gina-repair makaron nga San Juanico Bridge hay temporaryo nga naga-agi sa Aklan, kun sa siin kaeabanan kanda hay bukon it kabisado ro karsadahon.
