KALIBO, Aklan – Ginselebrar it kabilugan nga eskwelahan it Northwestern Visayan Colleges – Elementary Department ro World Teacher’s Day ku Biyernes nga adlaw, Oktubre 4.
Suno kay Aileen Quimpo-Hernandez ro Principal I it nasambit nga pribadong eskwelahan nga simple eamang ro andang naging selebrasyon.
Naghimo sanda it programa nga may mga aktibidades kapareho it pagharana it mga estudyante sa mga manugturo, induction it Parents-Teachers Assosciation ag Supreme Student Council.
Maabo man sigon sanda nga nabaton nga regalo apang para kana bisan wa it regalo hay okay eamang.
Paathag nana nga tanan nga mga indibidwal sa pihak it mga propesyon hay may mga habueo nga leksyon ag habuligan it mga manugturo.
Raya man ro nagtueod kana para mangin sangka maestra nga sa makaron hay sobra 20-anyos eun sa anang propesyon.
Dugang nana nga anang manugturo sigon dati hay ginpabatyag kana nga imaw ra hay may importansya ag may haeaga ngani nga naispire imaw.
Nasayuran nga World Teacher’s Day hay gindeklara it UNESCO ku 1994.
