Gindeklara it Department of Education ukon DepEd Region 6 nga madinaeag-on ag matawhay nga nagtapos ro Western Visayas Regional Athletic Association ukon WVRAA meet 2026 nga ginpatigayon sa Passi City.
Suno kay DepEd Regional Office 6 spokesperson Hernani Escullar Jr., nga naging maayos ro kabilugan nga daeagan it pahampang ag owa it nailista nga anumang untoward incident sa bilog nga duration it kompetisyon.
Gindayaw it DepEd ro kooperasyon it mga atleta, coaches, manugturo, ag mga lokal nga opisyal nga naging yabe sa eowas ag organisadong pagpatigayon it nasambit nga regional sports event.
Ginpakita man sigon it mga participants ro mataas nga lebel it disiplina ag sportsmanship sa nagkaeain-eain nga hampang.
Mabahoe man ro naging papel it lokal nga gobyerno it Passi City sa pagpahaum it mga pasilidad ag seguridad agud nga masiguro ro kamaeayran it tanan nga mga participants ag bisita.
Gindugang pa it DepEd nga ro madinaeag-on nga pagpatigayon it WVRAA 2026 hay pamatuod it epektibong koordinasyon it nagkaeain-eain nga ahensya ag komunidad sa rehiyon.
Ro WVRAA sigon hay padayun nga nagaserbing importanteng entablado para sa paghubog sa talento it mga pamatan-on nga atleta bilang pagpahaum sa mga masunod pang kompetisyon kaparehoi it Palarong Pambansa.
Sa kabilugan nga resulta, nagpanguna ro Schools Division of Iloilo sa medal tally, kasunod ro Iloilo City ag nagapangatlo ro Aklan, base sa opisyal nga listahan it pahampang.
