KALIBO, Aklan–Nagaeum ro Aklan Police Provincial Office ukon APPO nga maangkon ro zero casualty ukon zero injury para sa nagahilapit nga pagsug-aeaw sa bag-ong dag-on hinduna.
Suno kay P/Corporal Leonilyn Artes, tagapaghambae it APPO nga sigidas makaron ro ginapatigayon nga inspeksyon it kapulisan kaibahan ro bureau of fire protection ag lokal nga gobyerno sa mga baealigyaan it paeupok ag pyrotechniques agud nga masiguro nga owa it makaeusot nga illegal firecrackers nga makahalit sa publiko ag propiyedad.
Mabahoe nga bagay suno kana ro pakikipagbueuligan it mga pumueuyu agud nga maangkon ro masadya apang eowas nga holiday season.
Kabilugan suno kana nga 11 nga mga firecracker display area ro nailista sa Aklan.
Uman nga ginpadumdum it APPO sa mga magapaeupok nga magdahan agud nga indi madisgrasya ukon maaksidente pag-abot sa paeupok.
Mas mayad sigon nga maggamit eon lang it alternatibong pampasangag agud nga indi maeukpan ro mga magagamit it anumang klase it firecrackers.
Sa kamatuoran suno kana hay ginsapubliko it PNP ro mga paeupok nga bawae makaron nga new year.
Pila sa mga raya hay ro Ilan sa goodbye bading, goodbye COVID, kwiton parachute, kwiton bomb, bin laden, special pla-pla, kabasi, atomic, coke-in-can, giant atomic , goodbye Philippines ag iba pa.
