Maga-abot sa 1.4 milyong pamilyang Pilipino ro posibleng bumagsak sa kapigaduhon kun kueang ro magiging sabat it gobyerno sa tunga it padayun nga oil crisis, suno sa Department of Social Welfare and Development (DSWD).
Ginplastar ni Social Welfare Secretary Rex Gatchalian ro pagtantiya sa hearing it Senate PROTECT Committee, base sa mga projection angot sa epekto it tensyon sa Middle East sa presyo it langis.
Ginpahayag pa nana nga ginmandu man ni Pangueong Ferdinand “Bongbong” Marcos Jr. nga siguraduhon nga indi madugangan ro mga pobre, umpisa sa target nga bulig para sa sektor it transportasyon.
Suno kay Gatchalian, ginaboeobanta nga 7.5 milyong kabaeayan ro pagataw-an it ayuda, kaibahan ro 3.5 milyong benepisyaryo it Pantawid Pamilyang Pilipino Program (4Ps), 1.5 milyong pigado nga mga pumueuyu nga gintumod sa Community-Based Monitoring System, ag 2.5 milyong near-poor ukon manabang sweldo it mga trabahador nga rehistrado sa Social Security System.
Ginaboeobanta nga naga-abot sa P74 bilyon ro kinahangeanon nga pondo agud nga masuportahan ro bottom nga 30 porsiyento it mga kabaeayan.
Ginkilaea man ni Gatchalian ro posibleng pagka-gaoy it publiko sa ayuda, apang gin-insister nga nabudlayan ro mga ekonomiya nga makabawi kun owa it bastante nga suporta halin sa gobyerno.
Samtang, ginpahayag ni Senator Sherwin Gatchalian nga masobra sa 400,000 nga kabaeayan ro posibleng maeakip sa near-poor category.
