KALIBO, Aklan — Kapin sa 100 mga resorts ag kompaniya sa isla it Boracay ro pwedeng kasuhan it Pollution Adjudication Board (PAB) bangud sa nagkaeain-eain nga environmental violations.
Suno kay Department of Environment and Natural Resources (DENR) Undersecretary Sherwin Rigor nga kaibahan sa nasambitang mga resorts ro kontrobersiyal nga Henann Group nga may an-om nga resorts, Kingfisher Farm ag Seven Seas Hotel.
Kon mapamatud-ang nagkasaea, ro mga resorts ag iba pang kompaniya hay magapangatubang sa milyong pisong multa ag pagpasarado it establisimento.
Ginpahayag pa ni Rigor nga sa oras nga makapaguwa it resolusyon sa nasambitang mga resorts, magadihon sanda it kasong kriminal kontra sa mga raya sa korte.
Mag-eowas sa DENR, ginaeaumang magadihon man it seperadong kaso ro National Bureau of Investigation ag Department of Interior and Local Government.
Raya hay sa tunga it pag-comply it Henann resorts sa mga requirements it Boracay inter-agency task force agud uman nga maka-operate ro andang mga resorts kapin eon ro pag-construct it sewerage treatment plants (STPs).
Dugang pa ni Rigor nga pwedeng pasugtan nga makabukas ro Henann samtang padayon nga ginapamatian ro andang kaso it PAB.
