KALIBO, Aklan — Eubusan eon nga ginpasarado it Boracay Inter-Agency Task Force (BIATF) ag lokal nga gobyerno it Malay ro 12 establisimento nga maeapit sa main road sa isla it Boracay.
Suno kay Natividad Bernandino, head it Boracay Inter-Agency Rehabilitation and Management Group nga nag-eabag ro mga raya sa 12 meters road easement law halin sa main road samtang ro pila hay owa it mayor’s permit.
Owa pa sigon gintibag it mga tag-ana it edipisyo ro andang balcony ag overhang ukon mga naka-usling istraktura sa ginpaeapad nga karsada.
Ro 12 nga ginpasarado hay kaibahan sa 25 establisimentong gintaw-an it closure order ko Hunyo 17.
Pila sa mga raya hay ro sikat nga health and wellness shop, sangka banko, cellphone repair shops ag iba pa.
Ginpahayag ni Bernandino nga ikaywang parte raya it andang crackdown operations kontra sa mga pasaway nga establishments owners sa isla.
Nasayuran nga ko nagtaliwan nga buean, 11 nga establisimento man nga kaabuan hay ginapanag-iyahan it mga Chinese ro ginpasarado it task force.
Gin-abisuhan man sigon nanda si Environment Secretary Roy Cimatu sa nagapadayun nanda nga imbestigasyon sa pilang opisyal it DENR nga ginasugid nga nag-isyu it certification sa mga establisimento nga may una pang pageabag.
Ginaeauman nga makaangkon pa it ikatlong round it closure sa pag-pungko it mga bag-ong ilihir nga opisyal sa Hulyo.
