Naga-abot sa 12 nga katawo ro namatay matapos bumagbag ro sangka pribadong eroplano maeapit sa Butler Memorial Airport sa Butler, Missouri, adlaw it Domingo, Hunyo 14.
Ayon sa aircraft operator nga Skydive Kansas City, kaibahan sa mga namatay ro 11 nga skydivers ag sangka piloto nga sakay it eroplano.
Ginpahayag it Missouri State Highway Patrol nga natabu ro aksidente sa lugar nga kapin sa 100 kilometro sa nabagatnan it Kansas City.
Base sa paunang imbestigasyon, nag-eupad ro single-engine turboprop aircraft bandang alas-11:20 it agahon apang owa raya nakabo-oe it bastante nga altitude bago gulping nagliko pawaea ag bumagbag sa may 300 yards halin sa runway.
Ginkilaea it National Transportation Safety Board (NTSB) ro bumagbag nga saeakyang pangkahawaan bilang sangka Pacific Aerospace 750XL.
Suno kay Bates County Sheriff Chad Anderson, owa it indikasyon nga may kaangtanan ro insidente sa terorismo ukon iba pang krimen.
Mas pang naging masakit ro trahedya bangud nga pila sa mga igbata it mga biktima ro nakasaksi mismo sa pagbagbag it eroplano.
Owa pa ginpaguwa ro pagkatawo it mga namatay samtang ginahueat nga maabisuhan ro tanan nga pamilya it mga raya.
Sa lugar eon ro mga opisyal it Federal Aviation Administration (FAA), samtang ginaeauman nga maga-abot man ro mga imbestigador it NTSB agud nga magpatigayon it mas madaeum nga imbestigsyon.
Suno sa NTSB, posibleng abuton it 12 hasta 24 buean bago maipaguwa ro pinal nga report angot sa rason it aksidente.
