KALIBO, Aklan—Patong-patong nga kaso ro paga-atubangon it 13 nga magkabarkada matapos nga magpakita it mga pekeng COVID-19 test result agud nga makasueod sa isla it Boracay.
Suno kay Lt. Col. Don Dicksie De Dios, hepe it Malay Municipal Police Station nga pekeng RT-PCR test ro gin-presenta it mga nadakpan sa validation team it Provincial Task Force nga nakabantay sa Caticlan Jetty Port.
Nagapanguna sa gihapon nga travel requirements sa mga turista nga halin sa guwa it isla it Panay ro negatibong RT-PCR test agud nga makasueod sa Boracay.
Gindugang pa ni De Dios nga ro mga nadakpan hay puro naghalin sa Luzon.
Matapos sigon nga ma-verify nga peke ro mga dokumento nga andang ginpakita hay insigida sanda nga ginbo-oe sa andang ginadayunan nga hotel ag gindaea sa banwa it Kalibo ag makaron hay naka-quarantine sa pasilidad it Provincial Health Office.
Mag-eowas sa igapasakang kaso nga falsification of documents ag RA 11332 ukon Mandatory Reporting of Notifiable Diseases and Health Events of Public Health Concern Act hay igadeklara pa sanda nga persona non grata it lokal nga gobyerno it Malay bangud sa owa pagsunod sa patakaran nga ginapatuman.
