IRAQ – Patay ro 15 ka Islamic State militant group fighters sa military operation it Estados Unidos sa Anbar sa western Iraq.
Sa pareho nga operasyon, 6 man ka mga soldado it Estados Unidos ro nasamaran.
Gihambae it US defense officials nga pila sa napatay sa operasyon ro nagabuyot sa posisyon sa liderato sa mismo nga militante nga grupo.
Antes ro operasyon, nag-partner ro U.S. Central Command sa Iraqi security forces bangud armado ro ISIS operatives it nagkaeain-eain nga weapons, grenades, ag explosive ‘suicide’ belts.
Pahayag pa it central command, ginhimo ro operasyon para tapnaon ro abilidad it ISIS nga magplano, mag-organisar, ag magpatigayon it atake sa mga sibilyan sa Iraq imaw man sa mga pumueuyo it Amerika ag anda nga mga kaalyado.
Uwa man it indikasyon nga may nadaeahig nga mga sibilyan sa ginhimo nga raid.
