KALIBO, Aklan — Padayun nga ginatumod it mga kapulisan ro pagkatawo it tatlong suspek nga gina-alegar nga nagbihag, nagbugbog ag nagtakaw sa kagamitan it 18-anyos nga daeaga samtang nagatikang pauli sa andang baeay sa Sitio Bukid, Brgy. Tigayon, Kalibo, Lunes it gabi-i.
Ro biktima nga gintago sa pangaean nga Maria kaibahan ro anang ina hay insigidang nagreklamo sa pulisya kontra sa tatlong owa pa nakilaea nga mga suspek nga ginaeakipan suno kana it daywang babaye ag sangka eaeaki.
Sa panaysayon it biktima, samtang nagapa-uli imaw sa andang baeay halin sa eskwelahan hay gin-eambagan imaw it mga suspek ag dayun nga gintak-euban it supot it semento sa ueo.
Pwersahan raya nga ginsakay sa motorsiklo ag gindaea sa suba ag gin-eub-eub ro anang ueo.
Owa pa sigon nakuntento ro mga suspek ag ginlaslas ro anang alima ag iba pang parte it eawas.
Bangud sa anang pagwinaeas, ginbayo sigon imaw sa anang kilid agud nga magkalma.
Nakapaeagiw suno kana imaw matapos nga angkiton ro alima it sambilog sa mga suspek nga nagapuko kana.
Nagguwa eamang imaw sa anang ginapanaguan ag naka-uli sa andang baeay matapos nga masiguro nga owa eon ro mga suspek.
Ginapatihan nga pagpanakaw ro motibo sa insidente bangud nga matapos nga ginwaswas ro anang bag hay ginbo-oe ro anang P500.
Samtang, ginsaysay it ina it biktima nga nag-uli nga nagakurog ag basa ro eambong it anang unga.
Ginhakos sigon nana raya agud nga mapakalma bangud sa koeba nga nabatyagan.
Matapos nga masayuran ro natabu hay insigida sanda nga nagdangop sa Kalibo Police Station para sa nagakaigo nga imbestigasyon ag mapasabat ro mga may kahimuan.
