KALIBO, Aklan — Nagapangatubang sa kasong rape ro sangka 18 anyos nga eaeaki matapos nga akusahan it pagpanghimueos sa sangka 14-anyos nga dalagita sa Sitio Baybay, Brgy. New Buswang, Kalibo .
Base sa report, ginsampit ro biktimang si alyas Joy it anang amiga sa birthday party sa baeay it suspek nga si Florencio Sta. Maria, estudyante it Alternative Learning System ukon ALS ag residente it nasambit nga lugar.
Apang gin-aywan sigon imaw it anang amiga ag sambilog pang eaeaki.
Ginsaysay pa it biktima nga samtang nagapungko sa sofa hay gina-alegar nga ginhimuslan raya it suspek nga ana man nga kabarkada.
Pilit sigon imaw nga nagsukoe , apang masyadong pwersado ro eaeaki.
Matapos nga maabusuhan hay ginpa-uli sigon imaw it suspek rason nga nakaangkon it kahigayunan nga maka-report sa pulisya kaibahan ro anang pamilya.
Sa follow-up operation it Kalibo Police Station, naaresto ro suspek.
Samtang, sa interview it Bombo Radyo, ginpamalibaran it eaeaki ro alegasyon kontra kana .
Suno kana nga pareho nanda nga ginusto ro natabu bangud nga may crush sigon kana ro biktima.
Sa kamatuoran pa suno kana hay ro babaye ro unang nagpakita it motibo matapos imaw nga birahon ag ginbo-oe sigon ro anang alima ag ginsueod sa maselan nga parte it eawas it biktima.
Pagkatapos hay nag-uba ro babaye , apang hasta eamang sa paghulikap ro anang ginhimo ag owa eon nagsobra pa bangud sa kahadlok nga nabatyagan.
Ginpaidaeum imaw sa inquest proceeding makaron nga adlaw it Lunes, Agosto 19.
