IBAJAY, Aklan—Patay ro daywang rider ag naninahan ro angkas it sambilog sa mga raya kat magbueungguan ro andang mga motorsiklo sa national highway nga sakop it Brgy. Agbago sa banwa it Ibajay bandang alas-12:50 kaina it aga-aga it Sabado.
Suno kay Leowel Leroy it MDRRMO-Ibajay nga madasigan ro andang pagtratar sa mga pasyente nga madaea eagi sa ospital bangud nga puro grabe ro lastro nga andang naagum sa ueo ag iba pang parte it andang eawas.
Sa inisyal nga imbestigasyon, ro sambilog sa motorsiklo hay halin sa barangay poblacion nga direksyon samtang ro sambilog pa hay halin mat’a sa Nabas ag paagto sa nasambit nga lugar.
Ro mga rider hay sangka babaye ag eaeaki nga parehong sa legal nga edad .
Ro daywa hay parehong gindeklara nga dead on arrival sa Ibajay District Hospital samtang padayon pa nga gina-obserbahan ro sangka backrider.
Sa CCTV footage, makita nga matsa naghana nga maga-u-turn ro sambilog nga rider rason nga nakaangkon it collision.
Indi man nanda matumod kon una sa impluwensiya it aeak ro mga biktima.
Sa makaron hay nagapadayun ro imbestigasyon it pulis sa insidente.
