KALIBO, Aklan—Daywang ka mga repatriated seafarers eon ro nakauli sa natungdan nanda ka mga panimaeay halin sa ligtas covid center nga gintaeana it lokal nga gobyerno it Malay matapos nga nag negatibo sa RT-PCR test.
Suno kay Madel Joy Tayco, deputy information manager it Malay inter-agency task force against COVID-19, ro anda nga quarantine facility hay naga-cater eamang it mga repatriated overseas filipino workers kon sa siin tigsambilog kada kwarto nga provided tanan ro andang mga kinahang-eanon.
Sa makaron hay may una sanda nga tatlong ka mga indibidwal ag ginapaabot pa nanda kabie ro limang ka mga ofw’s para idto eon sa andang facility maga-quarantine it 14 diyas.
Sa pihak kara, maskin nga una eon sa modified general community quarantine ro bilog nga probinsya it Aklan hay ginlaygayan gihapon ni Tayco ro mga locally stranded individual nga magahalin sa mga kaeapit nga probinsya nga magsikyar gihapon it medical certificate halin sa lugar nga andang temporaryong gintiniran agud mapamatud-an ag masiguro nga bukon sanda it suspected sa Covid-19.
Samtang, ro mga magauli sa Malay nga halin sa ibang rehiyon hay kinahang-ean man nga magsikyar it health certificate ag travel pass kamana man obligado nga magpaidaeom sa 14 diyas nga quarantine period.
