Ginkasa eon ro dag-unan nga tatlong buean nga pagbawae sa pagpangisda sa Visayan Sea, sambilog sa pinaka-bugana nga lugar it pangisdaan sa nasyon.
Opisyal nga ginlunsar it Bureau of Fisheries and Aquatic Resources (BFAR) it Department of Agriculture (DA) ro closed season it pagpangisda sa idaeum it Fisheries Administrative Order No. 167-3 umpisa Nobyembre 15, 2024 hasta Pebrero 15, 2025 sa banwa it Estancia, Iloilo.
Ginpahayag ni BFAR-6 Regional Director Remia Aparri nga ro pagbawae hay magatau it daean sa herring, mackerel, sardines, short-bodied mackerel, Goldstripe sardine, Indian mackerel, Fimbriated sardine, ag rainbow sardines nga uman nga mag-repopulate ukon magpa-abu.
Ro tikang hay makasabat man sa pagpa-abu it isda sa Visayan Sea nga makatau it pangabuhian sa masobra sa 100,000 nga mangingisda.
Ro mga lugar nga sakop hay ro Gigantes Island sa probinsiya it Iloilo; Isla it Olotayan hasta sa Culasi Point sa probinsiya it Capiz; naaminhan-nasidlangan nga punta it Bantayan Island sa probinsiya it Cebu; nakatungdan it Guimaras Strait, ag naaminhan nga baybayon it Negros Island.
Nagpangayo it bulig ro BFAR sa Philippine National Police (PNP) Maritime Group, PNP-Criminal Investigation and Detection Group (CIDG), ag Philippine Coast Guard (PCG) para ipatuman ro fishing ban.
Gin engganyo man it BFAR ro mga local government units (LGUs) nga magbulig sa pagpatuman it pagbawae pinaagi sa andang sea patrol groups
