KALIBO, Aklan—Naga-abot eon sa 36 ro fully-vaccinated nga mga dumueuong nga turista nga nag-abot sa Isla it Boracay matapos nga uman nga buksan it nasyon ro borders kara sa mga foreign travelers.
Suno kay Malay Tourism Officer Felix Delos Santos naghalin ro mga dumueuong nga turista sa United States, Germany ag United Kingdom umpisa ko Sabado, Pebrero 12 hasta Lunes, Pebrero 14.
Kaabuan sigon sa mga raya hay naghalin sa Thailand ag iba pang nasyon sa Asya antes nga nagtabok paagto it Pilipinas.
Nagaeaum si Delos Santos nga maga-dere-deretso eon ro pagsueod it mga foreign ag domestic tourists ag indi eon makaangkon it bag-ong variant it COVID-19.
Suno pa sa opisyal nga masobra eon sa 102% ro vaccination rate it mga tourism workers sa isla ag gin-umpisahan eon man ro pag-administer it booster shots.
Makaron sigon nanda nabatyagan ro uman nga pagbukas it turismo sa Boracay sa pagsueod it mga foreign tourists.
Ginaeauman nga magabuhos ro Asian tourists sa Hunyo hasta Agosto, ro tiempo it andang bakasyon.
Ssamtang, sa selebrasyon it Valentine’s Day, nag-abot sa 2,491 ro tourist arrivals.
Sa makaron hay nakalista eon man sanda it 2,000 hasta 3,000 nga turista kada adlaw.
Umpisa Pebrero 1 hasta 14, kabilugan nga 29,182 ro nagbakasyong turista sa isla.
