KALIBO, Aklan — Trenta y sais nga miyembro it Revolutionary Proletarian Army/Alex Bongcayao Brigade (RPA-ABB) ro nagsurender it andang mga baril, bala ag pampasabog sa 12th Infantry Batallion, Philippine Army sa Aklan.
Sa pakikipagbueuligan it Office of the Presidential Adviser on the Peace Process (OPAPP), ginpatigayon ro pormal nga pag-turn-over sa Barangay Cabugao, Ibajay, Aklan ko Setyembre 8 it agahon.
Mag-eowas sa mga soldado, nagdeploy man it mga kapulisan ag iba pang law enforcement agencies sa lugar agud nga masiguro ro seguridad ag kaeowasan it mga nagpartisipar.
Ro mga armas nga ginbalik hay ginaeakipan it mga long firearms, short firearms, mga pampasabog ag nagkaeain-eain nga mga bala.
Raya tanan ngara hay gindaea sa headquarters it Philippine Army’s 3rd Infantry Division sa Camp Macario Peralta, Jamindan, Capiz.
Ginpahayag nga ro pagbalik it mga armas it RPA-ABB ukon KAPATIRAN hay kaparte it kasugtanan sa Clarificatory Implementing Document (CID) nga ginpirmahan it grupo ag gobyerno it Pilipinas ko Hulyo 19, 2019 agud nga eubusan nga maangkon ro handum para sa 2000 peace agreement.
Bilang kaparte man it decommissioning process, ro mga dating rebelde hay magatinir sa 3ID headquarters sa sueod it haeos daywang buean agud nga magpaidaeum sa training sa Army.
Matapos ro training, sanda hay pagataw-an it armas agud nga maging miyembro it Special Civilian Active Auxiliary.
Ro RPA-ABB hay breakaway group it CPP-NPA. Nagseparar sanda sa CPP-NPA ko 1996 bangud sa magkaiba nga ideolohiya.
