KALIBO, Aklan—Nagapangatubang sa kasong frustrated murder ro sangka 37-anyos nga eaeaki matapos nga ginbuno kara ro anang kaugalingon nga ingkampod sa Brgy. Ambolong, Batan.
Ginkilaea ni P/Lt. Maricel Guevarra it Batan PNP ro suspek nga si Anthony Andrade samtang ro biktima hay si Odessy Andrade, 39-anyos ag parehong residente it nasambit nga lugar.
Base sigon sa andang imbestigasyon, una sa impluwensya it aeak ro daywa kon sa siin nakaangkon sanda it mainitan nga diskusyon hasta nga ginsundan it suspek ro biktima pauli sa andang baeay.
Kaangot kara, nag-abot ro daywa kon sa siin gilayon nga ginbuno ni Anthony sa abaga sa likod nga porsyon it eawas it ice peak si Odessy rason it pag-angkon kara it lastro.
Naawat sigon it andang pamilya ro magtimbang nga parte apang duguan eon ro biktima nga insigida man nga gindaea sa Altavas District Hospital apang matapos nga gin-eapatan it paunang medikasyon hay ginrefer man imaw sa Aklan provincial hospital kon sa siin imaw sa makaron nagapabilin nga naka-confine para sa anang nagakaigong pagbueong.
Samtang, ro nasambit nga suspek hay una sa paghinakop it pulisya matapos nga maaresto sa andang residensya.
