KALIBO, Aklan—Uwa it naging epekto ro tumama nga magnitude 4.8 nga linog sa probinsya it Antique bandang alas-5:20 it aga-aga, adlaw it Sabado.
Suno kay Antique Provincial Disaster Risk Reduction Management Council head Mr. Broderick Gayona-Train nga base sa andang pagpangusisa hay uwa it mga propyedad nga nagkaeasamad sa tumama nga linog nga ro epicenter hay nailista sa bahin it Tibiao, Antique.
Ginpahayag dugang ni Train nga nasundan pa raya it daywang ka mga aftershocks nga may 3.3 magnitude ag 2.9 magnitude ro kabaskugon.
Samtang, nabatyagan man ro kapareho nga kabaskugon it pag-uyog sa iba pang parte it probinsya kamana man mga kaeapit-probinsya it Aklan ag Capiz.
Nagpadumdom man si Train sa publiko nga maging alerto engkasong may tumama nga linog ag himuon ro nagakadapat kaparehas it duck, cover and hold kamana man inde magpanic bangud nga raya pa kon amat ro nagiging rason it disgrasya.
