Ap-at nga retiradong mahistrado it Korte Suprema ro ginbo-oe bilang amici curiae ukon legal advisers it Senate impeachment court agud nga magtau it kaklaruhan sa isyu kun kinahangean sa gihapon ro 16 nga boto para masentensiyahan si Vice President Sara Duterte, sa pihak nga ap-at nga senador-judge ro owa makapasakop sa pagbista.
Kaibahan sa mga gintaeana sanday dating Chief Justices Artemio Panganiban, Reynato Puno ag Hilario Davide Jr., kamana man si retired Associate Justice Adolfo Azcuna. Sanday Panganiban, Puno ag Azcuna hay maga-atubang sa impeachment court sa Setyembre 16, samtang magasumite man si Davide it legal memorandum.
Nakasentro ro isyu sa probisyon it 1987 Constitution nga nagahambae nga nagakinahangean it two-thirds it tanan nga miyembro it Senado para masentensiyahan ro sangka impeachable official. Sa makaron, owa nagapasakop sa pagbista sanday Ronald “Bato” dela Rosa, Jinggoy Estrada, Rodante Marcoleta ag Loren Legarda, rason nga gina-kuwestiyon kon dapat magapabilin ro 16-vote requirement.
Kun masentensiyahan si Duterte, pwede eagi imaw nga mapahalin sa puwesto bilang Vice President ag pwede man nga papanaugan it perpetual disqualification sa pagbuyot it anumang pampublikong posisyon. Samtang, ginaeauman nga magaboto ro mga senator-judge sa isyu it 2/3 voting threshold matapos ro oral arguments it prosecution ag defense sa Setyembre 23.
