KALIBO, Aklan — Sambilog ro patay samtang ap-at nga iba pa ro naninahan kat araruhon ro mga raya it sangka pampasaherong electronic tricycle ukon e-trike samtang naga tindog sa kilid it karsadahon sa Sitio Ambolong, Barangay Manocmanoc, Boracay.
Owa eon nakaabot nga buhi sa ospital ro biktimang si Tony Sultan, 67, residente it nasambitang lugar bangud sa gin angkon nga nina sa anang ueo.
Padayun nga gina bueong sa ospital sa isla ro iba pang mga biktimang sanday Eric Roberto, 39; Norberto Villamor, 48; Shailyn Minto, 14 at Abdani Palanggi, 16, nga nakaangkon it kasamaran sa magkaeain-eain nga parte it andang eawas.
Sa custody man it Boracay Tourist Assistance Center (BTAC) ro driver it e-trike nga si Lazaro Daguno, 47 anyos it Barangay Balabag, Boracay.
Base sa report, naduea-an sigon it preno ro e-trike sa padaos-dos nga porsyon it karsadahon dahilan nga binunggo eon lang sa poste agud makalikaw sa mga kasubeang nga saeakyan apang, gin araro man kara ro mga biktima.
Gina sugid nga bag-ong bakae eamang ro nasambitang e-trike ag gina test drive kat matabo ro aksidente.
Kasong reckless imprudence resulting in homicide ag multiple physical injuries ro gin pasakang kaso kontra sa driver.
