KALIBO, Aklan — Owa eon it kabuhi nga nakit-an ro sangka 67 anyos nga eaeaki nga naga-eutaw-eutaw sa suba nga sakop it Brgy. Bakhaw Sur, Kalibo, hapon it Lunes, Disyembre 30.
Ginapatihan nga naeumos sa nasambit nga lugar ro biktimang si Jaime Verino, residente it Brgy. Andagao, Kalibo.
Nasapwan raya it mga kaeaeakin-an nga nagapamunit sa suba.
Suno sa mga nakasaksi nga nakita nanda ro biktima nga nagabalik-balik sa lugar, apang owa nanda raya ginsapak sa pagpati nga nagapaligos eamang imaw.
Haeos 15 minutos ro nakataliwan kat makit-an nanda ro eawas it biktima nga gina-anud eon sa suba.
Gintinguhaan nanda raya nga haw-ason sa tubi ag gin-revive apang owa eon naga-response.
Samtang, ginpahayag ni Elmer Crisostomo, bayaw it biktima nga bandang alas-5:30 it aga-aga ko Sabado hay napan-uhan nanda nga owa eon raya sa andang baeay.
Gin-inusoy sigon nanda raya, apang owa nakita ag pagkataliwan it 24 oras hay gin-report nanda sa Kalibo Municipal Police Station.
Nasayuran nga gintabangan it mga residente ro anang bayaw sa Brgy. Old Buswang Kalibo matapos nga malipong ag gindaea sa Aklan Provincial Hospital.
Posible suno kana nagtakas raya sa ospital rason nga may nakakabit pa nga dextrose sa anang alima.
Bangud nga indi eon makaintigo nga mag uli, nagbinaktas ro biktima hasta nga maka abot sa Brgy. Bakhaw sur sa may dumping site ag nag-eusong sa suba rason nga naeumos .
Ginasugid nga ro lolo hay may deperinsiya sa paminsaron umpisa ko 2022 kat mag-uli halin sa Manila.
Nagapadayun pa ro imbestigasyon it mga kapulisan sa insidente.
