KALIBO, AKLAN – – – Patay ro sangka lola matapos nga masunggaban it motorsiklo sa barangay Rosario, Malinao.
Ginkilaea ro biktima kay Emelda Reselba, 67 anyos ag residente it nasambit nga lugar.
Ginasugid nga nagtabok sa karsada maghalin sa payag paadto sa andang baeay ro nasambit nga biktima.
Nasayuran nga mahinay magtikang ro biktima bangod sa anang pagka-stroke dati.
Ginapabutyag nga uwa napan-uhan it biktima ro madasig nga motorsiklo rason nga imaw hay nasunggaban.
Insigida raya nga gindaea sa sangka pribado nga ospital sa banwa it Kalibo apang gindeklara eon nga patay.
Sa pihak nga parte, boluntaryo man nga nag surrender ro driver it motorsiklo nga si Michael Imaculata, 34-anyos residente it Bulabud, Malinao.
Sa makaron hay temporaryong nakahunong sa lock-up cell it Malinao PNP station ro nasambit nga driver/suspek para sa nagakaigo nga disposisyon.
