KALIBO, Aklan—Dismayado ro Commission on Elections ukon Comelec Kalibo sa kawad-an it kooperasyon it pilang barangay council sa pagpatigayon nanda it automated counting machine ukon ACM roadshow and demonstration.
Suno kay election officer Atty. Christian Itulid it Comelec-Kalibo nga umpisa ko Disyembre 4 hasta 9 hay napueo eon nga barangay ro andang haagtunan para sa nasambit nga demo and lecture.
Apang may pilang barangay nga sangkiri eamang nga mga pumueuyu ro nagtambong .
Ro mga masunod nga barangay nga andang pagaagtunan hay ro Caano, Mabilo, Estancia, Tinigao, kamana man sa Linabuan Norte ag Tigayon kun sa siin target nanda nga pagatapuson sa Disyembre 18.
Dugang pa ni Atty. Itulid nga magabuhay hasta sa Enero 30, 2025 ro andang roadshow.
Samtang, sa mga NGO entities nga interesado para sa andang ACM lecture and demonstration hay magsueat eamang sigon sa andang taeatapan agud nga ma-accomodte sa andang schedule.
Nagpahayag man sigon it interes para sa nasambit nga aktibidad ro Kalibo Municipal Police Station, Department of Education, ASU Kalibo campus, nagkaeain-eain nga mga kolehiyo, chamber of commerce, BJMP ag Aklan Rehabilitation Center .
Ginpahayag it opisyal nga pinaagi sa roadshow hay ginapasugtan ro mga participants nga testingan ro proseso it pagboto gamit ro ACM agud nga eubus nga maintindihan ro user-friendly nga interface kara.
Ro aktibidad hay bilang pagpahaum sa nagahilapit nga 2025 National and Local Elections.
