KALIBO, Aklan – – – 90 porsiento it mga naga pakamatay hay bangud sa mental disorder ag clinical depression.
Suno kay Dr. Cornelio Cuatchon it Provincial Health Office (PHO) Aklan nga ro iba pa gid nga rason it pagpakamatay it sangka tawo hay gina eakipan it alcohol ukon substance abuse, family problem ag chronic illness ukon physical illness.
Sa makaron suno kay Cuatchon hay padayun pang gina tumod kun ham-an maabong kaso it naga suicide sa probinsiya hay naga halin sa banwa it Batan.
Aminado man raya nga nagpangayu eon it bulig ro RHU-Batan sa andang taeatapan agud matalakay ro isyu sa komunidad.
Nasayuran nga kaabuan man sa mga naga suicide hay naga pang idaron it 15 hasta it 24 anyos.
Gin hayag ni Cuatchon nga kinahangean nga pamatian ro mga tawong depress bangud sanda ro naga kinahangean it eubus nga pagpalangga, pagtatap ag pagpaintindi.
Makabig nga ro depression sigon hay seryoso nga sakit ag indi dapat pagbalewalaon.
Gin pahayag dugang pa kara nga mabahoe ro papel it pamilya sa mga tawong depress.
Gin laygay man ni Cuatchon nga pwedeng magpangayu it professional help sa mga makarondayang sitwasyon.
Dapat man sigon ika-alarma ro mga danger signs it suicide kapareho it isolation, pagpabutyag it kawad-an it pag eaum, owa naga kaon kamana man nga owa eon naga katueog.
Samtang, agud malikawan nga magresulta sa depression, gin laygay ni Cuatchon nga kinahangeang kontrolon ro stress sa kabuhi , magpangamuyo, magpatigayun it healthy diet ag exercise kamana man nga dapat ipabilin ro bukas nga relasyon sa tunga it mga inunga ag ginikanan.
