KALIBO, Aklan — Uwa eon it makasueod nga mga local ag foreign tourist sa isla it Boracay pag-abot it Abril 26 it presenteng dag-on.
Raya ro naging pahayag ni Department of Interior and Local Government (DILG) Assistant Secretary Epimaco Densing III sa interview it Bombo Radyo Kalibo may kaangtanan sa pagpasara it Boracay.
Suno kay Asec Densing, halin sa tawo ro polusyon rason nga pagalimitahan ro mga tawong magasueod sa isla.
Ginklaro man kara nga mismong mga residente eamang it isla ro pagapasugtanan makaguwa ag makasueod apang magahimo sigon sanda it identification guidelines para dikara.
Ginpahayag dugang ni Densing nga raya hay agud ma-monitor eamang ro mga tawong magasueod sa isla para sa rehabilitasyon.
Halin sigon sa Caticlan Jetty Port hay may mga miyembro it kapulisan nga magabantay.
Sa pihak nga parte, haom eon sigon ro gobyerno kapin eon ro Department of Labor and Employment (DOLE) para sa mga mawad-an it trabaho ag maapektuhan it total closure.
Samtang, ginahueat eon lang makaron ro rekomendasyon maghalin sa National Disaster Risk Reduction Council (NDRRMC) agud makapagdeklara it ‘state of calamity’ sa isla it Boracay.
