KALIBO, Aklan — Nagpadayun ro Operation Baklas it ginbilog nga Kalibo Municipal Task Force agud nga mabo-oe ro mga sagabal sa mga karsadahon ag sidewalk kamana man ro mga spaghetti wires sa banwa it Kalibo.
Suno kay Municipal Engr. Amalia Francisco nga antes ginpatigayon ro pagbak-eas hay gin-abisuhan anay nanda ro mga negosyante ag mga residente nga mag-self demolish .
Nasayuran nga may pilang kurae ukon pader it baeay nga nakasueod sa setback ro gintibag.
Kaibahan man sa haagyan it andang operasyon ro mga lamesa ag bangko it mga naga-renta nga stalls sa Veterans Avenue nga haeos nagsobra eon sa mga side walk.
Samtang, nalipay man sigon ro munisipyo bangud sa kooperasyon it mga apektado sa andang operation baklas .
Raya suno kana hay sandig sa direktiba ni Pangueong Rodrigo Duterte agud nga malikawan ro paggutok it trapiko ag mabo-oe ro mga vendors nga nakapwesto sa mga sidewalk ag karsada.
Nauna man nga nagpaguwa it 60 diyas nga taning ro DILG sa mga mayors nga limpyuhan ag boe-an sa andang mga lugar ro mga kalhit, basura ag mga sagabal sa daean.
Sa pihak nga parte, ginatutukan man sigon makaron it munisipyo ro construction ag decloggig it mga drainage system.
