KALIBO, Aklan–Gusto makarun ni Bayan Muna Rep. Carlos Isagani Zarate nga ma-imbestigahan ro pagkamatay it siyam ka mga aktibista sa Calabarzon nga subject it warrant of arrests.
Ginpahayag ni Bayan Muna Rep. Zarate nga ro pakamatay it mga aktibista hay kabaliktaran sa ginahambae it gobyerno nga owa it nagakatabong extra judicial killing sa nasyon nga sambilog man sa ginakabig nga resulta it ginahimo nga red tagging.
Madumduman nga una eun nga nagpahayag it anang pag-eaum si Department of Justice (DoJ) Sec. Menardo Guevarra nga maging all set eun ro special investigating team nga mag-imbestiga sa pagkamatay it siyam nga akbitista.
Matapos nga i-refer it DoJ ro imbestigasyon sa pagkamatay it siyam nga katawo sa Administrative Order (AO) 35 hay gilayon raya nga nagbilog it team nga pagadumaeahan it mga prosecutors nga magatutok sa imbestigasyon.
Ro AO 35 hay sangka Inter-Agency Committee nga ginmanduan nga mag-imbestiga para sa mga Extra-Legal Killings (EJK), Enforced Disappearances, Torture ag iba pang Grave Violations nga may kaangtan sa Right of Life, Liberty ag ro seguridad it sangka tawo.
Mag-euwas sa DoJ nga lead agency, ro AO35 inter-agency committee hay ginakeakipan man it Department of Interior and Local Government (DILG), Department of National Defense (DND), Chief of Staff it Armed Forces of the Philippines (AFP), Chief it Philippine National Police (PNP), Director it National Bureau of Investigation, Chairperson it Presidential Human Rights Committee ag Presidential Advisers on Peace Process, and Political Affairs.
