Kinahang-ean ro maid-id nga screening sa pagbaton it mga naga-apply nga gwardya kon siin dapat nga kilaeanon it husto it mga security agency ro andang pagkatawo.
Suno kay Police Lieutenant Colonel Norlan Perante, chief provincial operation management unit it Aklan Police Provincial Office, ro mga aplikante hay dapat graduate sa security training antes pangayuan it mga requirements kaparehas it police, barangay ag NBI clearance.
Samtang, ro mga security agency hay kinahang-ean nga legal ro andang operasyon kon siin nagapaidaeom man raya sa maid-id nga pagsikyar it natungdan nga police unit.
Kapin sa tatlong dag-on ro validity it andang permit ag inde ro mga raya maka-renew engkaso nga may mga lapses ro andang ahensya.
Ginpahayag dugang ni Perante nga maabong requirements man ro kinahang-ean nga sikyaron it ahensya antes sanda nga makaoperate ag hurisdiksyon eon it nasambit nga taeatapan ro pagbaton it mga aplikante.
Madumduman nga sangka gwardya nga ginkilaeang si Mark Archie Torrefiel it Brgy. Cajilo, Makato ro ginaturo nga suspek sa makangieidlis nga kamatayon it reliever branch manager it RD pawnshop nga si Bonna Ambay it Brgy. Nauring, Pandan, Antique nga nauna eon nga nasapwan nga uwa it kabuhi ag nagapaligos sa kaugalingon nga dugo sa sueod it establisyimento
