Ginbatikos ni ACT Teachers Representative France Castro ro Department of Budget Management (DBM) angot sa hagna nga rightsizing government bureaucracy para makatipon it pondo kasunod it ginapangatubang nga krisis sa ekonomiya it nasyon.
Suno sa teacher solon ro planong rightsizing sa mga ahensiya it gobyerno hay maka-angkon sigon it negatibong epekto nga magaresulta sa massive layoffs, retrenchment, displacement, ag eabi eon nga magapalala sa contractualization.
Sandig sa inventory it Government Human Resources, ku nagtaliwan nga Agosto 31,2021 nga may kapin sa 582,378 job order personnel ro maghalin sa 2,337,802 nga empleyado it gobyerno.
Kaeakip sigon sa mga nagapanguna nga ahensyang may pinakamaabu nga JO ag COS hay ro DPWH, DOH, DepEd, DENR ag DSWD.
Gin-insister pa ni Castro nga sayod it Department of Budget and Management nga ro nasambit nga hagna hay makaapekto sa 2 milyong empleyado it gobyerno.
Gusto sigon it ahensya nga makatipid it kapin sa P14 bilyon kabaylo it pagkaduea it mga trabaho it 2 milyong Pilipino nga maapektuhan it nasambit nga hagna.
Ginpaathag pa it mamalidha nga kung kinahangean it pondo it gobyerno, pagasukton nanda ro P203 billion nga utang it pamilya Marcos sa mga pumueyo.
Hugot nga tutukan ro koleksyon it buwis ag pagapanabaton ro mga owa ga bayad.
Samtang, dugang pa ni Castro nga indi eon dapat nga pagpasugtan pa ro padayon nga paglobo it numero it mga Pinoy nga owa it trabaho eabi eon gid sa makaron nga panyempo nga doble ro kalisod it mga Pilipino bangud sa pagtaas it presyo it mga baeakeunon.
