KALIBO, Aklan—Kapin sa 22 nga garbage bag it mga nagkaeain-eain nga klase it basura ro natipon it Bureau of Fire Protection ukon BFP Nabas sa ginpatigayon nandang coastal clean up drive sa Brgy. Nagustan sa nasambit nga banwa.
Suno kay FO3 Menchie Alba, arson investigator ag shift supervisor it BFP Nabas, kabulig nanda sa nasambit nga aktibidad ro barangay council ag mga residente sa lugar.
Ginpahayag dugang nga raya hay sambilog sa andang mga best practices agud nga maengganyo ro mga pumueoyo nga maghimo man it kaparehas nga aktibidad agud nga malimpyuhan ro andang palibot.
Una kara, nagpatigayon man sanda it river clean up sa Brgy. Solido sa nasambit man nga banwa.
Samtang sa pihak nga parte, uman nga ginpadumdom ni FO3 Alba ro mga pumueoyo nga ro pagdahan hay bukon eamang it kada fire prevention month agud nga malikawan ro insidente it sunog kundi kinahang-ean nga himuon raya adlaw-adlaw.
Sambilog sa andang mga kampanya hay ro Exit Drill in the Home kon sa siin ginaengganyo ro publiko nga himuon raya sa sueod it panimaeay agud nga maskin ro mga inonga hay makasayod kon anu ro pagaobrahon sa oras it emerhensiya.
