KALIBO, Aklan—Gin aprubahan it Sangguniang Panlalawigan ro resolusyon nga nagatau it gahum kay Aklan governor Joen Miraflores nga magsueod sa Memorandum of Agreement ukon MOA nga uman nga boe-on ro serbisyo it sangka transport service company nga nakabase sa Iloilo nga magahakot it mga hazardous waste it waeo tanan nga mga ospital sa probinsiya it Aklan.
Suno kay Sangguniang Panlalawigan member Jay Tejada it ikaywang distrito nga parehong ginrekomenda it joint committee on environment and committee on laws ro pagtau it authority kay governor Miraflores para sa renewal it MOA.
Pasado sigon sa mga ginataeana nga requirements it Department of Environment and Natural Resources ukon DENR ro nasambit nga kompaniya partikular sa proper handling, storage, collection, transport, treatment, ag disposal it mga hazardous waste.
Halin sa Aklan hay gina-transport ro nasambit nga special waste sa Batangas agud nga idtu i-dispose sa registered nanda nga planta.
Target sigon it provincial government nga makaron nga dag-on ro tanan nga mga pampublikong ospital nga andang ginadumaeahan hay maka-konekta man ag maka-avail it kontrata sa nasambit nga transport service.
Nagabilin sa P85 pesos per kilo ro ginasukot it kompaniya sa ginahakot nga special wastes, kun sa siin ro andang paghakot hay nakadepende sa kaabuon it matipon nga solid waste.
Ro kontrata hay magabuhay kada tatlong dag-on nga kapareho sa unang kontrata nga ginsueod ni dating governor Joeben Miraflores.
Gindugang pa ni Tejada nga owa it naging problema ro operasyon it kompaniya rason nga uman nga ginbo-oe ro serbisyo kara.
