KALIBO, Aklan — Maid-id pa nga ginatun-an it Regional Tripartite Wages and Productivity Board Region-6 ro proposisyon nga P200 nga dugang sa adlawan nga sweldo it mga trabahador sa Western Visayas.
Sa interview it Bombo Radyo Kalibo, ginpahayag ni Atty. Sixto Rodriguez Jr., Regional Director it DOLE-6 ag chairman it RTWPB, presenteng gina-review it board ro petisyon para sa dugang nga sweldo matapos nga mapamatian ro magtimbang nga parte sa ginpatigayon nga public hearing ag consultation ko Oktubre 8 sa Iloilo City ag ginsundan sa probinsiya it Aklan.
Suno pa kana nga pagkatapos it public hearing sa Negros Occidental, ginaeauman nga magapaguwa it desisyon ro RTWPB sa Oktubre 23, ag target raya nga ipatuman sa Nobyembre it makaron nga dag-on.
Sa nasambit nga konsultasyon, nag apela sigon ro employers sector para sa patas nga desisyon nga makabulig sa mga empleyado apang indi man makapalugi sa mga employer, kun sa siin, masyadong mabug-at para kanda ro P200 nga umento.
Ginpamilit pa ni Rodriguez, handum nanda nga makabilog it patas nga desisyon para sa magtimbang nga parte.
