KALIBO, Aklan — Handum it barangay council it Bakhaw Sur, Kalibo nga makaangkon eon it sanitary landfill ro Aklan agud nga masolusyunan ro problema sa basura sa banwa it Kalibo ag kaiping nga mga banwa sa probinsiya.
Suno kay Bakhaw Sur Punong Barangay Bernabe Aquino nga posibleng tiempo eon agud nga maka-usoy it lugar ro provincial government nga mabutangan it tambakan it basura nga maeayo sa capital town.
Bangud sa masangsang nga hugum halin sa open dumpsite hay nagakabaeaka si Kapitan Aquino nga makaangkon raya it maeain nga epekto sa ikamayad nga eawas it mga residente ag sa palibot bangud nga ro tambakan it basura hay maeapit sa bakhawan ag sa Aklan river.
Sa pihak nga parte, ginpaabot ni Kapitan Aquino nga gin-umpisahan eon it mga tawuhan it Solid Waste Management Unit it LGU Kalibo ro pag-spray it kemikal ag pagtambak it eapok sa basura agud nga mapahagan-hagan ro hugum apang padayun nga nagasungaw ro baho bangud sa pag-inuean umpisa pa kahapon.
Mag-eowas kara, haeos adlaw adlaw man sigon hay maabu nga basura ro ginapilak sa lugar.
si Bakhaw Sur Punong Barangay Bernabe Aquino
Sa pihak nga parte, mabahoe ro naging pagpasaeamat ni Lorna Cortes, sangka residente it Bakhaw Sur Kalibo sa LGU Kalibo bangud sa tikang nga ginhimo sa andang ginapangatubang nga problema sa masangsang nga hugum it basura maskin nga raya hay temporaryong solusyon pa eamang.
Kasunod it ginpatigayon nga ocular inspection it LGU Kalibo kaibahan ro andang barangay council hay insigida nga ginhimo ro solusyon rason nga naghagan-hagan ro hugum.
Handum nanda nga mapasarado eon ro dump site agud nga maduea eon ro andang mabuhay nga ginaproblema nga makabig nga long term solution.
Lorna Cortes, sangka residente it Bakhaw Sur Kalibo
