Bumuo si Pangulong Ferdinand R. Marcos Jr. ng inter-agency organizing committee para pangasiwaan ang paghahanda ng Pilipinas sa Green Expo 2027 sa Japan.
Sa ilalim ng Administrative Order 41, itinalaga ang Department of Agriculture bilang chairperson at Department of Tourism bilang vice chairperson ng Philippine Organizing Committee (POC). Kasama rin sa komite ang mga pinuno ng Department of Foreign Affairs, Department of Trade and Industry, Department of Science and Technology, pati na rin ang National Commission for Culture and the Arts at Center for International Trade Expositions and Missions.
Ang POC ay may tungkuling tiyakin ang maayos na koordinasyon ng mga ahensya at magsumite ng quarterly at final reports sa Pangulo, kabilang ang detalye sa gastos, kita, nagawa, at epekto sa ekonomiya. Maaaring bumuo ng subcommittees at kumonsulta sa pribadong sektor, NGO, at akademya para sa teknikal na suporta.
Gaganapin ang Green Expo 2027 sa Yokohama, Japan mula Marso hanggang Setyembre 2027, na may temang “Scenery of the Future for Happiness,” bilang plataporma para ipakita ang biodiversity, sustainable agriculture, teknolohiya sa agrikultura, eco-tourism, at cultural heritage.
