Ginkumpirma it Department of Labor and Employment (DOLE) Region 6 nga uwa pa it pribadong kumpanya sa Western Visayas ro nagpatuman it ap-at nga adlaw nga workweek sa pihak it panawagan para sa mas flexible nga iskedyul sa trabaho.
Suno kay Atty. Jorge Ferraris, nagapabilin nga opsyonal ro flexible work arrangements ag nakadepende sa desisyon it mga employer, basta’t nagasunod sa nagairal nga laye sa pagtrabaho.
Ginpaathag nana nga pwedeng magpatuman it compressed workweek ro mga kumpanya, kaparehas it pagbilog it 48 oras nga trabaho sa mas sangkiri nga adlaw ukon 40 oras sa ap-at nga adlaw agud malikawan ro overtime.
Ginpunto it DOLE nga magapaidaeom sa striktong pag-usisa ro anumang pagbag-o sa work schedule agud masiguro nga inde maaapektuhan ro sweldo ag benepisyo it mga trabahador.
Kinahang-ean man nga may klaro man nga kasugtanan sa tunga it employer ag empleyado, nga nakasueat ag dokumentado ag ginsumite sa DOLE para sa monitoring.
Sa pihak it mga benepisyo kaparehas it mas maayos nga work-life balance ag mas manabang gastos, nagapabilin gihapon nga konsepto ro 4-day workweek sa rehiyon bangud sa kakueangan it kumpanyang haom magpatuman kara.
