Nagbiyahe eon si Pangueong Ferdinand R. Marcos Jr. paagto sa Kazan, Russia, Martes it gabi-i agud nga pangunahan ro partisipasyon it Pilipinas sa ASEAN-Russia Commemorative Summit ag magpatigayon it bilateral talks kaibahan si Russian President Vladimir Putin nga nakatutok sa energy ag food security.
Nagpanaw ro eroplanong ginsakyan it Pangueo kaibahan ro anang delegasyon halin sa Villamor Air Base sa Pasay City alas-11:55 it gabi-i.
Sa anang departure statement, ginpahayag ni Pangueong Marcos nga ro summit hay marka it ika-35 anibersaryo it relasyon it ASEAN ag Russia ag may bitbit nga espesyal nga panaw bangud nga raya ro anang unang pagbisita sa Russia samtang ginadumdum it Manila ag Moscow ro ika-50 anyos it diplomatic relations.
Dugang pa it Pangueo nga pagapasugtan it summit ro mga lider it ASEAN ag si President Putin nga repasuhon ro tatlong dekada it pagbueuligan ag tumuron ro mga patag para sa mas madaeum nga pakikipag-angot sa mga masunod nga mga dinag-on.
Ginaeauman nga magiging sakop it talakayan ro peace and security, trade and investment, food and energy security, science and technology, digital transformation, education, tourism, ag people-to-people exchanges.
Sa sidelines it summit, makikipagpueong man si Pangueong Marcos kay Putin para sa bilateral talks.
Ro nasambit nga biyahe it Pangueo hay sa tunga it pagtutok it mga gobyerno sa bilog nga kalibutan sa mga pagkabaeaka angot sa energy prices ag supply stability bangud sa nagapadayun nga geopolitical tensions.
Uman nga gin-insister ni Pangueong Marcos ro commitment it Pilipinas sa ASEAN centrality ag regional cooperation.
Sa pihak nga parte, si First Lady Liza Araneta-Marcos, sa sangka social media post, gin-describe ro biyahe bilang “brief but significant.” Dugang pa kara nga magataeana eamang ro Pangueo it 38 oras sa Russia sa pihak it gintingub nga 26-hour flight time.
Samtang, ro summit hay nag-umpisa makaron nga adlaw, Hunyo 17 hasta 18 sa Kazan, kun sa siin ginaeauman nga aprubahan it mga lider it ASEAN ag ni Putin ro importanteng dokumento nga naga-draft sa future areas of cooperation sa tunga it regional bloc ag Russia.
