Ginpahayag ni US President Donald Trump nga nagsugot ro Iran sa pag-inspeksiyon it andang nuclear facilities nga “infinite” ukon uwa it katapusan. Apang insigida rayang ginpamalibaran ag ginpalagan it Iran.
Ginhambae ni Trump sa anang online account nga eubusan nga nagpasugot ro Iran sa nuclear inspections sa paaeabuton.
Ginpamilit man nana ro mga bilyong dolyar nga frozen assets it Iran nga pagapahilwayon it US hay pagagamiton eamang para pang-bakae it pagkaon ag medikal nga suplay halin sa mga US company. Apang mahugot nga ginpamalibaran it Iran ro mga claims ni Trump.
Ginpahayag it mga opisyal it Iran nga uwa pa nanda gina-umpisahan ro pormal nga pag-ilistorya angot sa andang nuclear program sa ginhiwat nga pueong sa Switzerland.
Ginhambae man ni Ali Bahreini, ro ambassador it Iran sa UN sa Geneva, nga ro Iran ro magadesider kun paalin nanda paga-gastuhon ro andang kaugalingon nga pondo, baliskad nga ginahambae ni Trump.
