KALIBO, Aklan — Nagapanawagan ro sangka balikbayan sa Land Transportation Office (LTO-Aklan) nga mas pang pabaskugon ro pagpatuman it batas trapiko kontra sa mga tricycle ag motorsiklo nga gina alegar nga nagapang-agaw it linya sa mga national highway.
Suno kay Florsie Prado Ibardolasa, tumandok it Banga ag balikbayan halin sa Houston, Texas nga kada nagabiyahe sanda halin sa Banga paagto sa Kalibo ukon iba pang lugar, nataeupangdan nanda nga kaeabanan nga nagapatunga ro pilang tricycle ag motorsiklo sa karsada imbes nga gamiton ro outer ukon shoulder lane nga nakataeana para sa mga slow moving vehicle.
Ro mga drivers pa sigon it nasambit nga mga behikulo ro akig kon andang ginasita.
Nagatuga sigon raya it peligro sa ibang motorista ag nagiging rason pa it pag-gutok it daeagan it trapiko.
Bangud kara, gin-post nana ro anang obserbasyon ag baeatyagon sa social media, kun sa siin, owa nana nalikawan nga ikumpara ro sitwasyon sa Amerika nga hugut nga ginasunod ro traffic rules and regulations.
Kadungan kara, nag apela man imaw sa LTO nga pabaskugon ro pagbantay ag pagpatuman it mga naga-eksister nga laye angot sa lane discipline agud nga malikawan ro mga aksidente ag mapabilin ro kaayusan sa mga karsadahon.
Ginpadumdum man nana sa tanan nga mga motorista nga sundon ro mga batas trapiko ag gamiton ro tamang linya it karsada agud nga masiguro ro kaeowasan it tanan nga nagagamit it karsada.
Nasayuran nga sa idaeum it Republic Act No. 4136 ukon Land Transportation and Traffic Code ag sa memorandum it Department of the Interior and Local Government (DILG), ginataeana kara ro tamang paggamit it mga lane sa nagapangunang karsada.
