KALIBO, Aklan — Masobra sa P60,000 eon lang ro nabilin nga balanse sa masobra sa P200,000 nga hospital bill it namatay nga 19 anyos nga daeaga nga si Jessa Mae Narce matapos makabaton it bulig pinansyal halin sa pilang opisyal it Aklan ag mga pribadong indibidwal.
Sa post sa social media, ginpahayag ni dating Libacao Mayor John Randy Zapata nga nagdangop kana ro pamilya it biktima agud nga magpangayo it bulig bangud sa ginapangatubang nga problemang pinansyal.
Suno kay Zapata, nakipag-angot imaw kay Congressman Jess Marquez kaibahan ro pamilya nga nagresulta sa pagbawas it P100,000 sa hospital bill.
Nagpromisa man sigon ro kongresista nga magatau it hasta sa P20,000 nga burial assistance sa oras nga maiproseso ro death certificate it biktima.
Mag-eowas kara, nagbaton man ro pamilya it P50,000 nga bulig halin kay Governor Jo-en Miraflores, samtang may iba pang mga opisyal ag pribadong indibidwal ro nagpaabot man it bulig pinansyal.
Ginklaru man it dating alkalde nga owa it halong politika ro anang pagbulig ag boluntaryo nga nagpaeapit kana ro pamilya Narce.
Kadungan kara, nagaeaum imaw nga mataw-an it hustisya ro pagkamatay it daeaga ag mapadasig ro imbestigasyon sa kaso.
Madumduman nga namatay ro daeaga ko Hulyo 9 matapos ro pilang adlaw nga pagtinir sa ICU bangud sa grabeng lastro sa anang leog sa insidente nga natabu sa Brgy. Poblacion, Libacao.
