Hugut nga ginkundina it Department of Foreign Affairs (DFA) ro China Daily bangud sa pag-publish kara it AI-generated video ag editorial cartoons nga nagapakita sa mga Pilipino bilang mga amo angot sa ika-10 anibersaryo it 2016 West Philippine Sea Arbitral Award.
Sa pahayag it DFA ko Hulyo 16, ginpahayag kara nga nag-eampas eon sa lehitimong talakayang pampulitika ro ginpaguwa nga materyal it state-run media it China, kaibahan ro video nga gin-post sa Facebook ko Hulyo 10, bangud sa gina-alegar nga nagapangsura, dehumanizing ag racist nga pag-discribe sa mga Pilipino.
Ginpamilit it ahensya nga maskin may magkakaibang panan-awan ro mga nasyon sa mga isyung legal ag pulitikal sa West Philippine Sea, indi raya dapat magresulta sa paggamit it mga nagapangdum-ok ag mapanamad nga imahe nga owa it lugar sa maayos nga pampublikong diskurso.
Ginhinyu it Pilipinas sa China Daily nga insigidang boe-on ro nasambit nga video ag iba pang kakaparehong kaundan ag nagapanawagan sa China nga ipatuman ro dignidad, pag-respeto ag kamatuoran sa pampublikong talakayan.
Ro kontrobersyal nga video, nga ginpaguwa antes ro Hulyo 12 anibersaryo it arbitral ruling, hay nagapakita it sangka amo nga nakasuksok it barong Tagalog ag salakot nga ginamanduan it mga karakter nga kahawig it Estados Unidos ag Japan bago wisikan it water cannon samtang buyot ro arbitral award.
Padayun man nga ginapanindugan it Pilipinas nga ro arbitral ruling ko 2016 hay pinal ag may gahum sa idaeum it internasyonal nga laye, sa pihak it padayun nga owa kara pagkilaea it China.
