Ginkilaea it international fashion magazine nga Teen Vogue ro P-pop group nga SB19 bilang kaibahan sa Best Dressed Celebrities sa Lollapalooza 2026, kasunod it andang debut performance sa sambilog sa pinakamabahoe nga music festival sa kalibutan.
Sa feature article nga may titulo nga “SB19 Honor Their Filipino Heritage With Lollapalooza 2026 Looks,” gin-feature it Teen Vogue ro makasaysayang pagpasakop it grupo bilang unang homegrown Filipino act nga nag-perform sa Lollapalooza.
Ginpamilit man sa artikulo ro andang modernong eambong nga may inspirasyon sa kulturang Pilipino.
Base sa report, tuyo it grupo nga maipakita ro makabag-ong kulturang Pilipino sa pamaagi it natural nanda nga pagkatawo. Ro andang stylist nga si Roy Back hay nagbo-oe it inspirasyon halin sa mga museo sa Pilipinas, kaibahan ro paggamit it mga burdang halin sa mga disenyo it mga katutubong komunidad.
Ginpakita man it Teen Vogue nga ro eambong nanday Stell, Pablo, Josh, Ken ag Justin hay nagasaeaming sa andang natungdan nga mga indibidwal nga personalidad.
