Sangka tumaeagsahon nga contest sa pagtueog ro pagahiwaton sa Tokyo, Japan sa Oktubre 5, kun sa siin bukon it kabaskog ukon kadasig ro kinahangean kundi ro ikasarang nga makatueog it hamuok sa pihak it mga istorbo.
Gin-organisa it kompanyang Koala Japan ro “Matt Race by Koala,” sangka 90-minutong sleep competition nga makaangkon it tatlong session ag tig-20 ro contestant sa kada session. Libre ro pagpasakop para sa mga edad 20 pataas, apang makaangkon it pabunot-bunot kun maga-eampas sa gintaeana nga numero ro mga aplikante.
Maga-eubog ro mga contestant sa Koala mattress samtang magagamit it sleep-tracking device nga magasukat sa kadaeum ag kalidad it tueog, kadasig nga makatueugan ag hamuok it tueog sa atubang it mga planned sleep disruptions. Ro may pinakamataas nga sleep score ro magadaog it 2.22 milyong yen. May una man nga special awards para sa pinakamadaeum nga tueog ag pinaka-kakaibang posisyon sa pagtueog.
Bago ro kompetisyon, magapaidaeum ro mga contestants sa sleep warm-up ukon “sleep gymnastics.” Ginabawae man ro hungod nga pagpueaw ag paggamit it sleeping pills ukon iba pang bueong nga pampatueog bago ro contest.
