Ginkwestiyon ni Senator-Judge Panfilo “Ping” Lacson kun may nagakaigo nga penalidad ukon saeabton ro mga testigong mapamatud-an nga nagapinuril samtang nagatau it testimonya sa impeachment trial ni Vice President Sara Duterte.
Sa ika-41 diyas it pagbista, nagpahayag si Senator Lacson it pagkadismaya sa naging daeagan it pagpamati, partikular sa ginpakita nga batasan it sangka testigo nga gina-alegar nga nagahibayag ag nagayuhum-yuhum samtang ginasabat ro mga pangutana sa atubang it impeachment court.
“We had a witness who smirked, who laughed,” kaparte it pahayag ni Lacson, nga naghambae nga owa naging mayad ro daeagan it pagbista bangud sa nasambit nga pagbinatasan it testigo.
Suno kay Lacson, owa nagakabagay ro makarondaya nga pagbinatasan sa sangka pagbista nga nagakinahangean it pagpakita it pag-respeto, pagiging seryoso ag katamparan halin sa mga testigong nagatau it andang testimonya sa idaeum it pagpanumpa.
Bangud kara, ginpasaka it mga senador ro isyu angot sa legal nga saeabton it mga testigong mapamatud-an nga nagapinuril samtang sa idaeum it pagpanumpa, kaibahan ro posibilidad it nagakaigo nga penalidad sa idaeum it laye.
Nagapadayun ro impeachment proceedings kontra kay Vice President Sara Duterte sa Senado.
