KALIBO, Aklan — Nadugangan pa ro numero it mga hotels ag resorts nga nataw-an it “go signal” it Boracay inter-agency task force nga makapag-operate sa isla it Boracay.
Base sa ginpaguwang listahan it Department of Tourism (DOT) nga may petsang Nobyembre 7, 2018, halin sa 157 hay nagaabot eon makaron sa 192 nga establisimento nga may kabilugang 8,227 rooms ro nataw-an it clearance nga magbukas.
Nauna eon kara nga nagpaandam ro DOT nga pwedeng makasuhan ro mga establisimentong uwa pa nakakasunod sa requirements it Department of Environment and Natural Resources (DENR) ag Department of Interior and Local Government (DILG) apang nagabaton eon it mga booking reservations ag nagabutang it mga online promotions.
Padayon ro padumdom it DOT sa mga turista nga magpa-book eamang sa mga hotels ag resorts nga may accreditation sa ahensiya agud inde maunsiyami ro bakasyon sa Boracay.
