KALIBO, Aklan— Nadugangan pa ro numero it mga accredited resorts ag hotel sa Boracay nga ginpasugtang makapag-operate it Inter-Agency Task Force makaron nga nagahilapit ro Paskwa ag Bag-ong dag-on.
Base sa listahan it Department of Tourism (DOT), nag-abot eon sa 287 ro numero it resort and hotel establishments nga gin-aprubahan it gobyerno matapos makasunod sa gintaeanang sueondanan.
Bangud kara, masobra 10,100 eon ro kwartong pwedeng i-accommodate it mga turistang magabisita.
Kadungan kara, uman nga nagpadumdom ro DOT sa mga establishimento nga inde mag-eabag sa ginapatumang sueongdanan kaangot sa kalimpyuhan it isla.
Gin-eaygayan man it ahensya ro mga turista nga siguruhong naka-book anay sa mga accredited hotels antes magbyahe bangud sambilog ro booking confirmation sa mga ginausoy nga requirement antes makaeosot sa Caticlan Jetty Port.
