KALIBO, Aklan—Padayon nga ipakigsukoe it Aeta Community sa isla it Boracay ro eogta nga napasaalima eon kanda ko tyempo ni dating Pangueong Rodrigo Duterte.
Suno kay Atty. Daniel Dinopol, legal counsel it mga Aeta nga raya hay maskin nga gindeny ro andang gindihon nga motion of reconsideration sa limang Certificate of Land Ownership Award ukon CLOA.
Bangud kara, insigida sanda nga nagdihon it apela agud nga inde daeayon nga makansela ro CLOA ag mabawian it maistaran ro mga katutubong Ati sa Boracay.
Himuon sigon nanda ro tanan nga pamaagi para maipakigsukoe ro kinamatarong it mga Aeta nga ginta-o kanda it dati nga administrasyon.
Ro eogta nga andang ginapakigsukoe sa makaron hay sarang nanda mapamatud-an nga pang-agrikultura bangud sa mga pananom nga anda eon nga ginaboe-an it pangitan-an.
Nauna eon nga nagapasaeamat ro mga Ati kasunod it legislative inquiry nga gindaea sa plenaryo it sangguniang panlalawigan.
Nagahinyo ro mga raya it suporta sa lokal nga gobyerno it Malay ag sa iba pang natungdan nga ahensya it gobyerno agud nga mataw-an it solusyon ro nagapameligrong mabawian ro mga raya it eogta.
