AFRICA – Gindeklara eon it Africa Centres for Disease Control and Prevention (Africa CDC) ro monkey pox bilang public health emergency sa Africa.
Suno sa grupo nga nagakabaeaka sanda bangod sa madasig raya nga naga-eapta.
Halin ko Enero hay masubra 13,700 eon ro nailista kara nga kaso kung siin may una nga 450 nga namatay sa Democratic Republic of Congo .
Nagakalhit eon man ro nasambit nga virus sa maabo nga nasyon sa Africa kaparehas sa Kenya, Rwanda, Burundi ag Central African Republic.
Nagpa-andam man si Africa CDC head Jean Kaseya nga kung indi raya matatapan hay malisdan eon nga makontrol.
Bangud sa pagdeklara it public health emergency hay mabuligan eon ro mga gobyerno nga makipag-coordinate sa anda nga pagresponde ag madugangan ro pagpadayon it suplay it bueong.
