KALIBO, Aklan—Magapabilin sa modified general community quarantine ukon MGCQ ro bilog nga probinsya it Aklan hasta sa Hunyo 30.
May kaangtanan kara, ginpahayag ni League of Municipalities of the Philippines Aklan chapter president ag Ibajay Mayor Joen Miraflores nga magapabilin man ro pila ka mga sueondanan nga nakabaehag sa executive order ni Governor Florencio Miraflores.
Ginpahayag dugang nga uwa it magabag-o sa hugot nga sueondanan kaparehas it mandatory nga pagsuksok it face mask, pag-obserba it physical distancing ag ro limitado nga operasyon it tanan nga negosyo sa bilog nga probinsya.
Magapabilin nga maga-iral ro curfew halin alas-9:00 it gabie hasta it alas-5:00 it aga-aga kamana man ro ginapatuman nga “no angkas policy”.
Pag-abot sa public transportation hay kinahang-ean nga sundon gihapon ro 50 percent seating capacity sa tanan nga klase it behikulo kaparehas eon lang sa tricycle nga kinahang-ean tatlo eamang ro makasakay kaibahan eon ro driver.
Suno pa kay Miraflores, maskin nga ginhaeogaan pa it husto ro paghueag it mga tawo hay kinahang-ean nga inde man raya maabuso.
Ginlaygayan man nana ro mga pumueoyo nga magpabilin gihapon sa tagsa-tagsa nanda ka panimaeay kon uwa it importante nga panaw sa guwa.
